Легендарниот инвеститор Ворен Бафет заклучи многу интересен квартал. Инвестицискиот гуру почна да ги ослободува големите залихи на готовина на „Berkshire Hathaway” во последните месеци, инвестирајќи милијарди долари во енергетските и компјутерските корпорации.

Но, и покрај инвестициите во енергетскиот и комјутерскиот сектор, негова најголема опсесија остануваат акциите во банкарскиот сектор за кои тој во неколку наврати изјави дека се негов фаворит.

Ворен Бафет е длабоко запознаен со банкарските и финансиските услуги. Тој смета дека бизнисот е релативно едноставен и може да биде исклучително профитабилен доколку добро се управува со него.

„Ако можете едноставно да се држите настрана од следењето на модните трендови и навистина да заработите, банкарството е исклучително добар бизнис во оваа земја“, им рече Ворен Бафет на инвеститорите на „Berkshire Hathaway” во 2003 година.

Веќе неколку години, најголемите американски банки се омилената инвестиција на Ворен Бафет и имаат значаен удел во портфолиото на „Berkshire Hathaway”. Банките се дел од инфраструктурата на земјата, сектор во кој тој постојано инвестира. Банкарството е бизнис што тој го разбира, бидејќи помогна во спасувањето на „Salomon Brothers” во 1990-тите, а исто така даде помош од 5 милијарди долари во „Goldman Sachs” во екот на финансиската криза во 2008 година, истовремено зголемувајќи го сопствениот удел и во JP Morgan (JPM).

Во 2009 година, тој дури рече дека Wells Fargo (WFC) е инвестицијата на која најмногу и верува.

„Ако треба да ја ставам целата моја нето вредност во една акција, тоа ќе биде таа акција“, им се доверил Бафет на акционерите на „Berkshire Hathaway”.

Всушност, најголемата акција на Бафет три години по ред до 2017 година беше „Wells Fargo”. Неодамна, кон крајот на 2019 година, „Berkshire Hathaway” имаше големи удели во четири од петте најголеми американски банки („Wells Fargo”, „Bank of America”, „U.S. Bankcorp”, „JP Morgan Chase”).