Германската економија ќе забележи значителен пад во вториот квартал, и покрај олеснувањето на мерките воведени за спречување на ширењето на коронавирусот, предупреди германската централна банка „Bundesbank”.

„И покрај олеснувањето на воведените рестриктивни мерки, социјалниот и економскиот живот во Германија сè уште се далеку од она што претходно се сметаше за нормален“, се вели во редовниот месечен извештај на германската централна банка.

Иако многу показатели укажуваат дека макроекономските трендови ќе се подобрат во вториот квартал заради олеснувањето на рестриктивните мерки, неизвесноста за идните движења во економијата е многу голема, велат од „Bundesbank”.

Изгледите за подобрување на пазарот на трудот во наредните месеци се исто така многу слаби, посочува централната германска банка.

Најголемата економија на еврозоната влезе во техничка рецесија во првиот квартал, при што БДП падна за 2,2 проценти на квартална основа, најголема по светската финансиска криза во 2008 година.