Во Европската унија и Еврозоната во вториот квартал на 2020 година, економските активности се намалија рекордно на квартална и на годишна основа уште од 1995 година, односно од почетокот на објавувањето на податоците за БДП, покажаа првите проценки на Евростат во петокот.

Сезонски прилагодениот бруто-домашен производ (БДП) во ЕУ во вториот квартал, сè уште обележан со мерки за борба против пандемијата Ковид-19 во повеќето земји-членки, падна за 11,9 проценти во однос на претходниот квартал, што е најголем пад од објавувањето на овие податоци во 1995 година, покажаа прелиминарните проценки на Евростат.

Во Еврозоната, сезонскиот прилагоден БДП, истовремено се намали за 12,1 проценти.

За споредба, во првиот квартал од оваа година, кварталниот пад беше 3,2 проценти на ниво на ЕУ и 3,6 проценти во Еврозоната.

Меѓу земјите членки за кои беа достапни податоците за вториот квартал на 2020 година, најголем пад има во Шпанија, 18,5 проценти. Следува Португалија, со пад на БДП за 14,1 проценти и Франција, со пад од 13,8 проценти.

Германската економија падна за 10,1 проценти во вториот квартал, додека пак економијата на Италија забележа пад на БДП од 12,4 проценти во однос на првите три месеци.

Најмал пад на БДП има Литванија од земјите чиишто податоци беа на располагање. Економската активност на Литванија за намали за 5,1 проценти.