Богатството на основачот на „Facebook“, Марк Зукерберг, достигна вредност од над 100 милијарди долари откога социјалната мрежа почна со нова услуга за кратки видеа, пренесува „BBC”.

Компанијата пред два дена во САД ја промовираше „Instagram Reels“, апликација конкурентна на контроверзната кинеска апликација „TikTok“.

Акциите на „Facebook“ се зголемија за повеќе од 6 проценти, а уделот на Зукерберг е 13%.

Во клубот на милијардери со имот над 100 милијарди долари, Зукерберг им се приклучи на основачот на „Amazon“, Џеф Безос и Бил Гејтс на „Microsoft“.

Шефовите на технолошките гиганти во последно време се наоѓаат под лупа поради постојаниот раст на моќта и личното богатство на нивните компании.

„Facebook“, „Amazon“, „Apple“ и „Google“ се меѓу најголемите победници од карантинот поради пандемијата на коронавирусот бидејќи сè повеќе луѓе купуваат, се забавуваат и се дружат преку интернет.

Богатството на Зукерберг се зголеми повеќе од 22 милијарди долари оваа година, а богатството на Џеф Безос се зголеми за повеќе од 75 милијарди долари, според податоците на „Bloomberg“.