Богатството на американскиот претприемач и милијардер Илон Маск се зголеми за 32,6 милијарди долари за само еден ден и достигна нето вредност од 304,2 милијарди долари. Растот се должи на значителниот раст на акциите на неговата компанија „Tesla”. Податоците се од рангирањето на милијардерите според списанието „Forbes“.

На тој начин, богатството на Маск се врати на нивото од ноември минатата година, кога првпат во историјата неговото богатство надмина 300 милијарди долари.

Маск беше најбогат човек на планетата и пред подемот на „Tesla”. Сега, сепак, неговото богатство ја зголеми разликата со она на неговиот најблизок ривал во бизнисот, извршниот директор на француската групација на компании „LVMH” (Louis Vuitton Moet Hennessy) Бернар Арно, чие богатство изнесува 200,6 милијарди долари.

Акциите на „Tesla” поскапеа на првиот ден од тргувањето на Њујоршката берза оваа година, за 13,53 проценти, достигнувајќи 1.199,78 долари по акција, поради извештаите за рекордно зголемување на понудата на електрични возила во 2021 година.

Компанијата на Маск испорача 936.172 електрични возила на клиенти, што е зголемување од 87 проценти во споредба со 2020 година.