Американскиот милијардер Бил Гејтс не е фан на криптовалутите и NFT. Основачот на „Microsoft” на конференцијата „TechCrunch” изјави дека криптовалутите се една голема измама.

„Тие трендови на дигитален имот 100% се темелат на „теоријата за поголеми будали“”, изјави Гејтс.

Тој се повика на теоријата според која понекогаш може да се заработи со купување на преценет имот ако тој имот подоцна може да се продаде по уште повисока цена.

„Еден „будала“ во тој случај би можел да купи прескап имот, надевајќи се дека може да го продаде на „уште поголем будала“ од себе и така да направи заработувачка. Тоа може да функционира се додека има доволно „будали“ подготвени да платат повеќе. Но, кога веќе никој нема да сака да купува, низата се прекинува и следува голем пад на цените”, додаде Бил Гејтс.

Бил Гејтс истакна дека тој не тргува со криптовалути и ги исмеа NFT, шегувајќи се дека „скапите дигитални слики на мајмуни исклучително ќе го подобрат светот“. Наспроти тоа, основачот на „Microsoft” рече дека преферира старомодни вложувања.