Бруто домашниот производ (БДП) на Еврозоната се намали за 3,6 проценти во првите три месеци од оваа година во однос на претходниот квартал, или 3,1 проценти на годишно ниво, според објавените сезонски прилагодени податоци од статистичката служба на Европската унија – Евростат.

Тоа е нешто помал пад од 3,8 проценти, колку што првично процени Еуростат, но сепак е најголем пад на економијата во Еврозоната уште од далечната 1995 година, кога датира статистичката служба на Европската унија – Евростат.

Во исто време, економијата на 27-члената Европска унија се намали за 3,2 проценти во првиот квартал во однос на претходниот квартал, што е и најголем пад регистриран досега, објави Евростат на својата официјална веб-страница.

Ова намалување на економската активност во Еврозоната е резултат на наглото опаѓање на потрошувачката на домаќинствата и инвестициите, како резултат на рестриктивните мерки воведени на средината на март за борба против пандемијата на коронавирусот.

Потрошувачката на домаќинствата во Еврозоната се намали за 4,7 проценти во овој период. Поради затворањето на продавниците, рестораните, кафеаните, инвестициите паднаа за 4,3 проценти, а извозот се намали за 4,2 проценти.

Од друга страна пак, се зголеми бројот на невработени лица во ЕУ, за минимални 0,2 проценти во однос на претходното тримесечје, што претставува прво зголемување на невработеноста уште од пролетта 2013 година, според податоците на Евростат.