Министерката за финансии Нина Ангеловска соопшти дека оваа недела, веднаш штом ги добијат листите со корисници, банките ќе започнат да ги издаваат платежните картички „Купувам домашно“, наменети за помош на граѓаните како дел од третиот сет економски мерки на Владата, а средствата ќе им бидат исплатени директно од Буџетот, преку владината КОВИД програма.

„Уредбата за платежните картички е веќе донесена, деновиве се обработуваат финалните листи на граѓаните кои ќе бидат објавени јавно. Секој што не сака да добие поддршка, може да каже. Очекуваме средствата да бидат префрелни во текот на идната недела или најдоцна после тоа да се изврши исплатата. Не гледаме дека би имало пречка во реализацијата на картичките, се работи за обемен проект кој бараше добра координација меѓу сите институции. Со платежната картичка „Купувам домашно“ граѓаните ќе плаќаат безготовински што ќе влијае на долг рок на креирање на навиките за безготовисно плаќање, но и на справување со неформалната економија”, изјави министерката Ангеловска.

Таа ги повика сите мали и средни бизнси кои немаат ПОС терминал, да набават, за да можат да ги примаат картичките.

„Најголем дел од банките ги нудат ПОС темирналите без никаков трошок без ралика на прометот”, се надоврза Ангеловска уште еднаш потенцирајќи дека ковид-кризата треба да ја искористиме за да промениме некои работи, да ја забрзаме нашата трансформација – и на економијата и на општеството.

Во врска со картичката, Ангеловска рече дека ова е прв пат да имаме ваков современ начин на аплицирање, без граѓаните да бидат принудени да одат во институциите.

„Сакаме да овозможиме на најлесен начин да ја добијат таа помош, да ја искористат на домашни производи и услуги за проектираните 25 милиони евра да имаат најголемо влијание и помош врз економијата”, додаде Ангеловска.