Инвестициската банка „Citigroup“ третата по големина американска банка по средства, суспендираше банкар кој работел на висока позиција, поради тоа што наводно крадел храна од кантината за вработените, пренесува BBC.

Медиумите известуваат дека се работи за извесен Парас Шах, директор за тргување со обврзници со високи приноси за Европа, Блискиот исток и Африка и дека заработувал повеќе од 1 милион фунти годишно, вклучително и бонуси. Веднаш по скандалот со кражба на сендвичи, тој бил разрешен од својата функција и привремено суспендиран, а можно е да се соочи и со отказ од банката.

Банката го суспендирала г-дин Шах кој е на возраст од 31 година, по бројните обвинувања дека крадел сендвичи од кантината во седиштето на банката во „Канари Варф” во источен Лондон, пренесува „BBC“.

Не е јасно колку сендвичи се тврди дека украл банкарот или за кој временски период се случиле наводните кражби.

Од „BBC“ се обиделе да контактираат г-дин Шах на LinkedIn, но неговиот профил не бил достапен и се чини дека е избришан.

Сепак, ова не е првпат еден висок службеник на „Citigroup“ да биде казнет за наводно или докажано недолично однесување. Претходно, директорот Џонатан Пол Бароус беше фатен дека постојано избегнува да купи билет за воз на пат за Лондон.