Министерката за финансии, Нина Ангеловска во денешното гостување на ТВ 24 најави дека Министерството за финансии подготвува ребаланс на Буџетот.

Таа воедно додаде дека и во услови на вонредна состојба се тече нормално, се исплаќаат предвремено пензии и плати, како и дека мерките кои досега ги донесе Владата биле одлично дизајнирани и дека голем број на компании се пријавиле за да ја искористат помошта која им се нуди.

„Буџетот е ликвиден да ги извршува своите основни обврски. Се тече нормално, субвенциите ги исплативме, повратот на ДДВ е за 26 проценти поголем од лани од април, плати, пензии, социјална помош, се тече нормално. За ребаланс, ние почнавме со изработка на ребаланс. Генерално, во моментов предизвик е неизвесноста, предизвик е да се појде од што пореалистични проекции на приходната, а од друга страна и расходната страна. Проекцијата на министерството за финансии е 3,4 проценти буџетски дефицит“, изјави Ангеловска.

Министерката јасно укажа дека не се откажува од идејата да се намалат платите на администрацијата.

„Не се работи на намалување во услови на криза. Се работи за намалување во услови кога, како ја добиваме сите платата, кога продуцираме и одиме на работа. И не плаќаат за сработеното, добиваме надомест, за тоа што сме го придонеле. Во ситуација кога половина месец не се работеше, не се одеше на работа, дел поради рестриктивните мерки, дел поради тоа што ротираше администрацијата со секој еден ден, во услови кога е намалена потрошувачката поради не трошење на услуги, не користите возило. Во услови кога не плаќате кредити бидејќи истите ви се одложени. Еден сосема поинаков контекст кој што не може да се спроеди со било која друга криза каде што би рекле ние ќе се стимулира приватна потрошувачка“, нагласи Ангеловска.