Американските авиокомпании и туристичките агенции во средата побараа од Владата на претседателот Џо Бајден да ја укине обврската за вакцинираните патници да покажат негативен тест за коронавирус за да можат да влезат во Соединетите Американски Држави, со цел закрепнување на туристичкиот сектор.

„Закрепнувањето на секторите за туризам и воздушен транспорт зависи од одлуката на владата да ги укине ограничувањата кои повеќе не се оправдуваат со сегашните околности”, напишаа околу 30 професионални здруженија во писмо до координаторот за борба против Ковид-19 во Белата куќа, Џефри Зиентс.

Еден од потписниците, „Ерлајнс фор Америка”, лоби група што ги застапува компаниите како „American Airlines Group”, „Delta Airlines” и „United Airlines Group”, го објави писмото на својата веб-страница.

Трите компании неодамна предупредија дека Омикрон верзијата на новиот коронавирус, која е многу заразна, но помалку опасна, ќе го одложи закрепнувањето за еден до два месеци.